كل واحد فينا لو فتح دماغه وبص جوه هيلاقي صراعات كبيرة وكتيرة ولا المصارعة الحرة اللي بنشوفها علي تليفزيونات الشيخ صالح. صراع بين الحلال والحرام ، الصح والغلط ، يصح ومايصحش ، رجولة ولا ندالة....وغيره .......انا كتير باحس باللخبطة ومانتش عارف الصح المطلق من الغلط المطلق بقت سمك لبن تمر هندي مع الاعتذار لرأفت الميهي!!!!
مباقيناش عارفين. وده طبعا اللي خلي مشايخ كتير وعلي رأسهم طبعا الشيخ البحبحاني يقول ان حاجات كتير من اللي كانت حرااااااااااااام بقت دلوقتي حلال واللي كان حلال مبقيناش عارفين هو ايه دلوقتي.
المساحات الرمادي بين الأبيض والأسود بقت كبيرة وكتيرة.....واحنا طبعا بنستهبل ما نصدق نلاقي فتوي نمسك فيها علشان نسلك حتة بزنس معصلجة علشان موضوع الحلال والحرام أو علشان نحلل الزمبة اللي هناخد بيها وظيفة احسن او نبرر الكدبة البيضا ؟؟؟!! اللي قلناها ساعة خوف .....الخ....
الموضوع ده خلي الدنيا ملخبطة في كل حتة وبقيت احس بان الناس بقي عندها وشوش كتيرة مش وش واحد،،،كلنا عمالين نغير الوشوش ونلبس في الأقنعة ونغير في جلدنا علشا نلحق نكبر او علي الاقل نهرب من الجزم اللي هاتدوس علينا.وعلشان كده انا بافضل ادور علي وشي الحقيقي وادور علي وشوش الناس التانية واشيل قناع ورا قناع ووش ورا وش لغاية ما الاقي الوش الحقيقي وساعتها افهم الحقيقة ويبقي التعامل مع الناس سهل وحقيقي.
انا رايح ادور علي وشي شوية واكشف لي كام وش كده.....
ليست هناك تعليقات:
إرسال تعليق